कोल्‍हापूर:
उच्चतम गुणवत्ता त्याचबरोबर उत्पादकांसोबत ग्राहकांचे हित व आधुनिकतेची जोड यामध्ये गोकुळ नेहमीच अग्रेसर राहिला आहे. गोकुळला आय.एस.ओ.२२०००:२०१८ हे मानांकन प्राप्त झाले असल्याची माहिती चेअरमन रवींद्र आपटे यांनी दिली.
यापूर्वी गोकुळकडे शाखा व मुख्य दुग्धशाळेकडे सुरवातीस ISO 9002,ISO 9001:2008 WITH HACCP (अन्न व सुरक्षा कार्यप्रणाली) व त्यानंतर ISO 22000:2005 या कार्यप्रणालीनुसार कामकाज होत होते. याचीच पूढील सुधारीत कार्यप्रणाली म्हणून ISO 22000 : 2018 हे मानांकन प्राप्त करणेचा प्रयत्न गेल्या दोन वर्षांपासून संघामार्फत सुरू होता. याचाच भाग म्हणून आंतरराष्ट्रीय पातळीवर सर्टीफिकेशनचे काम करणारी जर्मनमधील एजन्सी टी.यु.व्ही. नॉंर्ड यांचे वरिष्ठ पातळीवरचे अधिका-यांनी दि. 1 मार्च 2021 ते दि. 6 मार्च, 2021 या काळांत मुख्य दुग्धशाळेबरोबर विविध शाखांना भेटी देवून गोकुळच्या कामकाजाची तपासणी केली.
सदरच्या तपासणीमध्ये विशेषतः उत्पादीत होणारे गुणवत्तायुक्त दूध व दुग्धजन्य पदार्थ, अन्न सुरक्षा कार्यप्रणालीनुसार होणारे कामकाज, प्लॅंट स्वच्छता, दूध व दुग्धजन्य पदार्थ पॅकींगसाठी वापरणेत येणारे पॅकींग मटेरीयल व पॅकींगवेळी निघणारे वाया गेलेल्या पॅकींग मटेरीयलची केली जाणारी निर्गत इत्यादी बाबींचा विचार करून ISO 22000:2018 (As per food safety Mangement system) हे मानांकन देण्याचे जाहीर केले आहे.
सदरचे मानांकन मिळविणारा महाराष्ट्राच्या सहकारी दुग्धव्यवसाय क्षेत्रातील गोकुळ दुध संघ हा एकमेव व पहिला दुध संघ आहे. याचबरोबर एनडीडीबीच्या मामार्गदर्शनाखाली मुख्य दुग्धशाळेकडे क्यु मार्क (गुणवत्ता व्यवस्थापन) ही कार्यप्रणाली देखील राबविली जात आहे. ही गुणवत्तेची मानांकने मिळाल्यामुळे दुध उत्पादक व ग्राहकांचा गोकुळवर असलेला विश्वास वृद्धींगत होण्यास मदत होणार आहे. तसेच गोकुळची उत्पादने राष्ट्रीय व आंतरराष्ट्रीय बाजारपेठेत गुणवत्तेच्या जोरावर विक्रीस उपलब्ध करता येणार आहेत. ही भूषणावह बाब आहे.
कोरोना विषानुसारखा खडतर काळ असूनदेखील गोकुळचे अधिकारी व कर्मचारी यांचे सदरचे मानांकन प्राप्त करण्यासाठी मोलाचे सहकार्य लाभले आहे तसेच जिल्ह्यातील लाखो दूध उत्पादकांनी चांगल्या प्रकारचे दूध घातल्यामुळे हे मानांकन मिळवणे शक्य झाले आहे. यामुळे गोकुळच्या दूध व दुग्धजन्य पदार्थांच्या उत्पादनांना मुंबई, पुणे ,गोवा सारख्या उच्चभ्रू ग्राहकांकडून चांगल्या प्रकारे मागणी होणार असल्याने जिल्ह्यातील लाखो दूध उत्पादक शेतकऱ्यांना चांगल्या प्रकारे परतावा देणे शक्य होणार असल्याचे गोकुळचे चेअरमन रवींद्र आपटे यांनी सांगितले.
