पाऊस : पश्चिम महाराष्ट्रातील कोल्हापूर, सातारा आणि सांगली, कोकणातील रत्नागिरी, सिंधुदुर्ग या भागात जोरदार मेघगर्जना, विजांचा कडकडाट आणि गारपिटीसह पाऊस पडण्याचा पिवळा इशारा
पुणे :
मध्य महाराष्ट्र, मराठवाडा आणि कोकणात पुढील दोन दिवस तुरळक ठिकाणी मेघगर्जनेसह पाऊस पडेल, असा अंदाज हवामान विभागाने दिला आहे.
उत्तर भारतातील राजस्थान, गुजरात, झारखंड, मध्य प्रदेश या भागात गेल्या दीड महिन्यापासून तीव्र उष्णतेची लाट सुरू आहे. या भागाकडून महाराष्ट्राकडे उष्ण वारे वाहत आहेत. तर, दक्षिणेकडून महाराष्ट्राकडे दमट वारे वाहत आहेत. या दोन्ही वाऱ्यांची टक्कर महाराष्ट्रावर होत असल्याने कोकण, मध्य महाराष्ट्र आणि मराठवाडय़ात अवकाळी पावसाची शक्यता आहे.
पुढील दोन दिवसांत १३ ते १४ एप्रिल दरम्यान या भागात वादळी वाऱ्यासह पाऊस पडण्याची शक्यता आहे, तर काही ठिकाणी गारा पडण्याची शक्यता आहे. तसेच उत्तर प्रदेश ते विदर्भ पार करून मध्य प्रदेशाच्या काही भागाकडे द्रोणीय स्थिती आणि हवेच्या वरच्या भागात चक्रीय स्थिती सक्रिय आहे. याचाही परिणाम राज्यातील वातावरणावर होत असल्याने हा पाऊस पडत असल्याचे हवामान विभागाकडून सांगण्यात आले.
दरम्यान, पश्चिम महाराष्ट्रातील कोल्हापूर, सातारा आणि सांगली, कोकणातील रत्नागिरी, सिंधुदुर्ग या भागात जोरदार मेघगर्जना, विजांचा कडकडाट आणि गारपिटीसह पाऊस पडण्याचा पिवळा इशारा हवामान विभागाकडून देण्यात आला आहे.
गेल्या २४ तासांत राज्यात हवामान कोरडे होते. विदर्भात काही ठिकाणी, तर मध्य महाराष्ट्रात तुरळक ठिकाणी कमाल तापमानात सरासरीच्या तुलनेत किंचित वाढ झाली आहे. उर्वरित राज्यात कमाल तापमान सरासरीच्या जवळपास होते.
