पी.एन. पाटील यांचे सहकारातील कार्य आदर्शवत : कर्नाटकचे मुख्यमंत्री सिद्धरामय्या (संगमनेर येथे ‘ सहकारातील आदर्श नेतृत्व पुरस्काराने ‘ आमदार पी. एन.पाटील सन्मानित)
कोल्हापूर :
महाराष्ट्राला सहकार चळवळीचा मोठा इतिहास आहे. संगमनेर येथे सहकारमहर्षी भाऊसाहेब थोरात व हरित क्रांतीचे जनक डॉ. आण्णासाहेब शिंदे यांनी सहकारातून ग्रामीण भागाचा कायापालट केला. त्यांच्या नावे सहकारातील आदर्श नेतृत्व पुरस्कारासाठी पी. एन. पाटील यांची निवड सार्थ अशी आहे. पी. एन. यांचे सहकारातील कार्य आदर्शवत असल्याचे गौरवोदगार कर्नाटकचे मुख्यमंत्री सिद्धरामय्या यांनी काढले. कार्यक्रमाच्या अध्यक्षस्थानी माजी मुख्यमंत्री पृथ्वीराज चव्हाण होते.
संगमनेर (जि. अहमदनगर) येथील स्वातंत्र्यसैनिक, सहकारमहर्षी भाऊसाहेब थोरात व हरित क्रांतीचे जनक डॉ. आण्णासाहेब शिंदे यांच्या जन्मशताब्दी वर्षानिमित्त सहकारमहर्षी भाऊसाहेब थोरात सेवाभावी संस्थेचा ‘ सहकारातील आदर्श नेतृत्व पुरस्कार ‘ काँग्रेसचे आमदार पी.एन.पाटील सडोलीकर यांना कर्नाटकचे मुख्यमंत्री सिद्धरामय्या यांच्या हस्ते प्रदान करण्यात आला. याप्रसंगी ते बोलत होते. पुरस्कार प्रदान करताना सिद्धरामय्या यांनी आमदार पाटील यांची पाठ थोपटून विशेष अभिनंदनही केले.
यावेळी काँग्रेसचे विधिमंडळ नेते व कार्यक्रमाचे आयोजक बाळासाहेब थोरात म्हणाले, आमदार पी.एन.पाटील यांनी कोल्हापूर जिल्ह्यात केडीसीसी बँक, राजीवजी सूतगिरणी, श्रीपतरावदादा बँक, निवृत्ती संघ, भोगावती साखर कारखाना, आदी सहकारी संस्थेत पारदर्शक कारभाराचा आदर्श घालून दिला आहे. कोल्हापूर जिल्ह्यात सहकार वाढविण्यात आणि रुजविण्यात पी. एन. मोठे योगदान देत आहेत. त्यांचा या कार्याचा सन्मान म्हणून निवड समितीने ‘ सहकारातील आदर्श नेतृत्व पुरस्कारा’ साठी त्यांची निवड केल्याचा अभिमान आहे. ते कट्टर काँग्रेसवादी नेता व कार्यकर्ता घडविणारे विद्यापीठ आहेत.
स्वागत माजी विधानपरिषद सदस्य डॉ. सुधीर तांबे यांनी केले. कार्यक्रमास माजी मंत्री जितेंद्र आव्हाड, शिवसेना नेते भास्कर जाधव यांची भाषणे झाली. कार्यक्रमास काँग्रेसचे महाराष्ट्र प्रभारी रमेश चेन्नीथला, कर्नाटकचे मंत्री एच.के.पाटील, निमंत्रक आमदार सत्यजित तांबे, आमदार विश्वजित कदम यांचेसह राज्यातील आजी- आमदार, खासदार, काँग्रेसचे पदाधिकारी, कार्यकर्ते मोठ्या संख्येने उपस्थित होते. आभार युवा नेत्या डॉ. जयश्री थोरात यांनी मानले.
