केशवराव भोसले नाट्यगृह : कोल्हापूरचे काँग्रेसचे खासदार, आमदारांकडून ५ कोटींचा निधी : आमदार सतेज पाटील
कोल्हापूर:
कोल्हापूरचा ऐतिहासिक सांस्कृतिक व कलेचा अमूल्य ठेवा असलेल्या संगीतसूर्य केशवराव भोसले नाट्यगृह व खासबाग कुस्तीचे व्यासपीठ आगीच्या भस्मस्थानी गेले. या संगीतसूर्य केशवराव भोसले नाट्यगृह व खासबाग मैदानाच्या पुर्नबांधणीसाठी कोल्हापूरचे काँग्रेसचे खासदार, आमदार यांच्याकडून ५ कोटी रुपयांचा निधी देण्यात आला असल्याची माहिती कॉंग्रेसचे विधान परिषदेचे गटनेते व जिल्हाध्यक्ष आमदार सतेज पाटील यांनी दिली.
आमदार सतेज पाटील यांनी यावेळी नाट्यगृहाच्या पुर्नबांधणीसाठी कॉंग्रेसच्यावतीने सर्वतोपरी सहकार्य व प्रयत्न केले जातील अशी ग्वाही देत संगीतसूर्य केशवराव भोसले नाट्यगृह हे कोल्हापूर नगरीचे भूषण असून सांस्कृतिक चळवळीचे महत्वाचे केंद्र आहे. त्यामुळे ही वास्तू पुन्हा नव्याने उभारण्यासाठी सर्वांनी एकत्र येण्याची गरज असल्याचे सांगितले. नाट्यगृहाच्या पुर्नबांधणीसाठी आपल्या आमदार निधीतून दीड कोटी, खासदार शाहू महाराज आणि आमदार जयंत आसगावकर यांनी प्रत्येकी १ कोटी, आमदार ऋतुराज पाटील व आमदार जयश्री जाधव यांनी प्रत्येकी ७५ लाख रुपये असा एकूण ५ कोटींचा निधी उपलब्ध करून देण्याचे जिल्हा नियोजन समितीला पत्र दिल्याची माहिती दिली.
१९१५ साली राजर्षि छत्रपती शाहू महाराजांनी उभारलेल्या ऐतिहासिक नाट्यगृहात मराठी चित्रपट, संगीत आणि नाट्य सृष्टीत योगदान देणारे अनेक ख्यातनाम कलाकार घडले आहेत. हा ऐतिहासिक ठेवा पुन्हा नव्या दिमाखात उभा राहावे तसेच कलाकारांचे हक्काचे व्यासपीठ पुन्हा उभे करण्यासाठी आम्ही सर्वजण कटिबद्ध असल्याचेही आमदार पाटील यांनी सांगितले.
