जिल्ह्यात या तारखे पर्यंत बंदी आदेश लागू
कोल्हापूर :
जिल्हयामध्ये महाराष्ट्र विधान परीषद प्राधिकारी व्दिवार्षीक निवडणूक-2021 चा कार्यक्रम जाहीर करण्यात आला आहे, सध्या नामनिर्देशन फॉर्म भरुन घेण्याची प्रक्रिया, नामनिर्देशन पत्राची छाननी व उमेदवारी अर्ज माघारी घेणे या बाबतची प्रक्रिया जिल्हाधिकारी कार्यालय येथे सुरु आहे. जिल्हयात विविध पक्ष/संघटना, व्यक्ति/समुह यांचेकडून विविध मागण्या संदर्भाने मोर्चा, रॅली, उपोषण, आत्मदहन, धरणे इ. प्रकारची संभाव्य आंदोलने, विविध पक्ष/ संघटनाकडून त्यांच्या विविध मागण्यांसाठी वारंवार होणारी आंदोलने या बाबत जिल्ह्यात अनपेक्षित घटना घडल्यास कायदा व सुव्यवस्थेचा प्रश्न निर्माण होण्याची शक्यता नाकारता येत नाही. या कारणांमुळे जिल्ह्यात कायदा व सुव्यवस्था राखण्याकरिता, महाराष्ट्र पोलीस अधिनियम, 1951 चे कलम 37 (1) अ ते फ आणि कलम 37 (3) अन्वये जिल्ह्यामध्ये दि. 6 डिसेंबर 2021 रात्रौ 24.00 वा. पर्यंत जिल्हादंडाधिकारी राहुल रेखावार यांनी बंदी आदेश लागू केला आहे.
त्रिपुरा येथील हिंसाचार व प्रेषित मोहम्मद पैगंबर यांच्या विरोधात करण्यात आलेल्या आक्षेपार्ह घोषणाबाजी विरोधात रजा अकॅडमी व इतर मुस्लिम संघटनांच्यावतीने दिनांक 12 नोव्हेंबर 2021 रोजी राज्यभरात बंद पाळण्याचे आव्हान केले होते. मुस्लिम आंदोलकांनी हिंदुत्ववादी संघटनेच्या विरोधात केलेल्या घोषणाबाजीचे व्हिडीओ सोशल मिडीयावर प्रसारित झाल्याने हिंदुत्ववादी संघटनेकडून रजा अकॅडमी या संघटनेवर बंदी घालावी व दगडफेक करणाऱ्यावर तात्काळ कारवाई करावी या मागणीकरीता दिनांक 13 नोव्हेंबर 2021 रोजी अमरावती शहर येथे भाजपा व हिंदुत्ववादी संघटनाकडून पुकारण्यात आलेले बंदला हिंसक वळण लागून दगडफेक व जाळपोळीच्या घटना घडल्या आहेत. या घटनेचे पडसाद महाराष्ट्रातील इतर जिल्हयात देखील उमटलेले आहेत. झालेल्या घटनेच्या अनुषंगाने दोन्ही समाजातील लोकांच्याकडून आक्षेपार्ह पोस्ट सादर केल्याचे प्रकार घडत आहेत. हिंदु-मुस्लिम समाजाच्या संघटनाकडून आंदोलने करण्यात येत आहेत. या घटनेचे पडसाद कोल्हापूर जिल्हयात उमटू नये म्हणून जिल्ह्यात कायदा व सुव्यवस्था राखण्यासाठी बंदी आदेश जारी केला आहे.
कलम 37 (1) अ ते फ :-
अ) शस्त्रे, सोटे, तलवारी, भाले, दंडे, बंदूका, सुऱ्या, काठया किंवा लाठया किंवा शारिरीक इजा करण्यासाठी वापरता, येईल अशी इतर कोणत्याही वस्तु बरोबर नेणे. (ब) कोणताही दाहक पदार्थ किंवा स्फोटक पदार्थ अगर स्फोटके पदार्थ बरोबर नेणे. (क) दगड किंवा इतर क्षेत्रणात्रे किंवा क्षेपणास्त्रे सोडावयाची किंवा फेकावयाची उपकरणे किंवा साधने बाळगणे, जमा करणे किंवा तयार करणे. (ड) व्यक्तीचे अथवा प्रेते किंवा आकृत्या किंवा त्यांच्या प्रतिमा यांचे प्रदर्शन. (इ) जाहिरपणे घोषणा करणे, गाणी म्हणणे, वाद्ये वाजविणे. (फ) अशा प्राधिका-याच्या मते ज्यामुळे सभ्यता अथवा नितिमत्ता यास धक्का पोहोचेल अशा किंवा राज्याची सुरक्षितता धोक्यात येईल किंवा ज्यामध्ये राज्य उलथवून टाकण्याची प्रवृत्ती दिसून येत असेल अशी आवेशपुर्ण भाषणे करणे, हावभाव करणे, अगर सोंग आणणे आणि अशी चित्रे, चिन्हे, फलक किंवा इतर कोणत्याही जिन्नस किंवा वस्तु तयार करणे, त्यांचे प्रदर्शन करणे किंवा त्यांचा जनतेत प्रसार करणे.
कलम 37 (3) :-
जिल्हयामध्ये पाच अगर पाचहून जादा लोकांनी एकत्र जमा होणे, जमाव जमण्यास, मिरवणुका काढणे व सभा घेणे.
हा हुकुम ज्या सरकारी अधिकारी/कर्मचारी यांना त्यांची कर्तव्य, अधिकार बजाविण्याच्या संदर्भात तसेच निवडणूकीचे कामकाज करताना उपनिर्ऱ्दिष्ट वस्तू हाताळाव्या लागतात, आणि एकत्र जमावे लागते व ज्या व्यक्तींनी पोलीस अधिक्षक, अगर संबंधित उपविभागीय पोलीस अधिकारी अगर संबंधित विभागाचे पोलीस निरीक्षक किंवा सक्षम पोलीस प्राधिकारी यांची परवानगी घेतलेली आहे, अशा व्यक्तींना, तसेच सर्व जातीधर्माचे सण/उत्सव/जयंती/यात्रा, इ. हे शांततामय मार्गाने साजरे करण्याकरीता जमा होणारा जनसमुदाय यांना व लग्न, इतर धार्मिक समारंभ, सण, यात्रा, प्रेतयात्रा इत्यादी यांना लागू पडणार नाही.
